عوامی شاعری۔ سدھ سبھا نال عوامی لوڑاں، تھوڑاں، دُکھاں، سکھاں، ریجھاں، تانگھاں تے سُفنیاں دے زور اور بلارے دا دوجا ناں اے۔ عوامی شاعر لوک پیڑ دا شاعر ہوندا اے تے اوہدا سانجھ ساکا عام لوکاں نال جُڑیا ہوندا اے، حاکم دھڑیاں تے افسر شاہی نال نہیں ہوندا۔ اوہدا مرنا جینا عام لوکائی نال ہوندا اے۔ تھلڑا مزدور مجبور، راھک، محکوم تے مظلوم دھڑا ای اوہدی ذات برادری ہوندا اے۔ عوامی شاعر عوامی لہجے وچ سدھے سادے پر دل وچ فوری اُترن والے سچے اکھراں نال اپنے وسیب دے حاکماں دا بے دھڑک تے ان جھک ویروا کردا اے۔ انج اک سچے عوامی شاعر نوں لوک نمائندگی پاروں سوچ دی سولی اُتے سہکنا پیندا اے تے حاکم دھڑے ہتھوں اوہنوں ایہدا چوکھا بھارا مل وی تارنا پیندا اے۔ کڑیاں ، کوڑے، پہرے، مقدمے زبان بندی تے ظلم جبر تے خوف دی پھاہی ہر ویلے اوہدے سر تے ٹنگی رہندی اے۔ پیریں سنگل پاکے سچ دا تھیا تھیا، ناچ ای اوہدی تقدیر تے جاگیر ہوندی اے۔
اُتے بیانیا سبھ کجھ اُستاد دامن جیہے ندھڑک عوامی شاعر دا شعری تے فکری سرمایہ سی جیہدی اوہناں آخری دناں تیکر انکھی ڈھنگ نال سُچی راکھی کیتی تے اپنی سیاسی تے فکری معاشرتی جڑت پاروں اوہناں جو وی کھرا سچا جانیا۔اوہنوں ڈھول وجا کے آکھیا تے جلسیاں تے مشاعریاں وچ گج وج کے پڑھیا تے منافقت توں پاک سبھا نال کھری جذباتی تے انقلابی شاعری کیتی۔ اُستاد ہوریں وڈے عوامی شاعربن کے لوکائی دے دلاں وچ وس گئے۔ اُستاد ہوریں سٹیجاں دے بادشاہ تے مشاعریاں دے لاڑے سن۔ اوہناں دی سادہ پر پنجابی ثقافت نال شنگھاری چس تے رس بھری شاعری کمال دی سماجی طنز تے چوہبھ رکھدی سی۔ اوہ سبھا دے بے خوف شاعر سن، ایسے لئی حاکمی دھڑے اوہناں کولوں ڈردے رہندے سن۔ اُستاد دامن دی شاعری وچ سماجی انقلاب دا کھڑکارتے ہر قسم دے ظلم ودھروہ دے خلاف انکھی و نگار تے للکار وی اے۔ اوہناں دی شاعری سرمایہ داری، جاگیرداری، منافقت، وڈیرا شاہی، آمریت تے ظلمی دھڑیاں دے خلاف بغاوت والی شاعری اے۔
اُستاد ہوراں نے اُدماں، عزماں، ہمتاں، انکھاں، سدھراں، آساں تے تانگھاں دے سُچے دیوے بالی رکھے۔ ویلے دے پڑوچ اُستاد اپنی فقیرانہ سبھا نال عوامی ادبی شہنشاہ بن کے نترے ، لوک پیڑتا تے اپنی شعری فکر بارے اُستاد دا ایہہ مصرعہ اوہناں دی شاعری دا منشور بن گیا۔
خون جگر دا تلی تے دھر کے تے
دھرتی پوچدے پوچدے گزر چلے
پنجابی زبان نال اوہناں دی جذباتی جڑت سی اوہ پنجابی زبان نوں ماں دے برابر درجہ دیندے سن تے پنجابی دی ناقدری تے اوہ قلم نوں تلوار بنا لیندے سن۔
اُستاد دامن نوں اپنی سچی تے بے خوف عوامی شاعری دا ہمیشاں مُل تارنا پیا۔ اوہناں اُتے مقدمے بنے جیل وی بھگتی پر اوہ عوامی اظہار دے گھول وچ ہمیشاں جیتو رہے تے لوکائی نے اوہناں دے سر تے عزت دی پگ بنھی رکھی۔ اُستاد ہوراں اپنی حیاتی معاشی سوکھتا نال نہیں کٹی اوہناں نوں عہدے ، تمغے،پلاٹ، امداد دی پیشکش وی ہوئی پر اوہناں اپنے اصولاں پاروں سبھ کجھ ٹھکرا کے خودی داشملہ اچار کھیا سچ نوں سچ ای آکھیا تے جھوٹھ نوں جھوٹھ۔
ادبی حوالے نال اُستاد دامن نے روایتی پنجابی نظم نوں لوک پٹیر دے انقلابی رنگ نال رنگیا۔ تے نظم دے کئی رنگاں وچ انقلابی شعری ہڑھ دیاں طوفانی چھلاں بھر دتیاں۔ اپنی سیاسی فکر پاروں اوہناں دی پاکستان دے کسے حاکم نال نہیں بن سکی تے اوہ ہر دور دیاں سیاسی سماجی معاشرتی تے معاشی کو ہجھاں اُتے ننگی تلوار بنے رہے۔ ایس حوالے نال اُستاد دی پنجابی عوامی شاعری وچ پاکستان دی پوری سیاسی تاریخ پڑھی جا سکدی اے۔ مجموعی طور تے اوہناں دی شاعری ویہویں(20)صدی دیاں برصغیر دیاں ساریاں سر کڈھ سیاسی سماجی تے تاریخی تحریکاں دا صاف شفاف شیشہ وکھاندی اے، اُستاد ہوراں دی شعری زبان سرل پنجابیت نال پُر عوامی اکھاناں ورگی من بھاونی سی۔
اُستاد دامن دی انسانیت بھری عوامی آفاقی شاعری عمل، ولولہ، انکھ، انا، جاگرتی، ہمت تے اُدم دی انقلابی طاقت ونڈ دی اے۔ اُستاد دامن دی مقبول عوامی شاعری حقی طور تے مظلوم تے مجبور طبقیاں دی پُکار، ونگار تے جابر دھڑیاں لئی اک انکھی للکار بن کے سدا جیوندی رہے گی۔
رانجھا تخت ہزاریوں ٹُرے تے سہیپیراں ہیٹھ سیالاں دا جھنگ آؤندا
ایک تبصرہ شائع کریں